பட்டுப் போகும் பட்டுத் தொழில்?

பட்டுக்கான இறக்குமதி வரி 5 சதவீதத்தில் இருந்து, 10 சதவீதமாக அதிகரிக்கப்படுவதாக கடந்த மாதம் வெளியான மத்திய பட்ஜெட்டில் அறிவிக்கப்பட்டது. இம்முடிவு காஞ்சிபுரம், ஆரணி, சின்னாளப்பட்டு உள்ளிட்ட தமிழகப் பகுதிகளில் வாழும் கைத்தறிப் பட்டு நெசவாளிகளை பெரும் அதிர்ச்சியில் ஆழ்த்தியுள்ளது. அரசின் முடிவால், நெசவாளிகளுக்கு கடும் பாதிப்பு ஏற்பட்டுள்ளது.

பனாரஸ், காஞ்சிபுரம், தர்மாவரம் என பல இந்திய ஊர்கள் பட்டுக்கென்றே புகழ்பெற்றவை. இவற்றில் கணிசமான அளவு பட்டுப் புடவைகள் உற்பத்தியானாலும், இதற்கான மூலப்பொருளான பட்டு நூல் உற்பத்தி இன்றைய நிலையில் இந்தியாவில் குறைவுதான். நாட்டின் ஒட்டுமொத்த பட்டு தேவையில், மூன்றில் ஒருபகுதி இன்றும் இறக்குமதி மூலமே பெறப்படுகிறது.

இந்நிலையில், பட்டு நூல் உற்பத்தி செய்வோர் பாதிக்கப்படக் கூடாது என்ற நோக்கில் இறக்குமதி வரியை அரசு உயர்த்தியுள்ளது.ஆனால் இந்த முடி‌வால் இன்னொரு முனையில் பட்டாடை உற்பத்திச் செலவை அதிகரிப்பதோடு, ஏராளமானோரின் வேலைவாய்ப்பையும் பாதிக்கும் என்ற கருத்தும் எழுகிறது.

பட்டுக்கு இறக்குமதி வரி உயர்வை எதிர்த்து கடந்த ஒரு வாரமாக தமிழகமெங்கும் போராட்டங்கள் வலுப்பெற்று வருகின்றன.கோவை, சின்னாளப்பட்டி என பல இடங்களில் உள்ள கைத்தறிப் பட்டு நெசவாளிகள் உண்ணாவிரதம், பேரணி என பலவகையில் போராட்டங்களில் ஈடுபட்டுள்ளனர்.

கோவை நெசவாளிகளின் தேவைக்காக மட்டுமே மாதத்துக்கு 100 டன் கச்சாப் பட்டு சீனாவில் இருந்து இறக்குமதி செய்யப்படுவதாகவும், இப்போதைய வரி உயர்வால், கிலோவுக்கு 400 ரூபாய் கூடுதலாக செலுத்த வேண்டி வரும் என்றும் நெசவாளிகள் கவலை தெரிவிக்கின்றனர். திண்டுக்கல் மாவட்டம் சின்னாளப்பட்டி பகுதியில், நெசவுத் தொழிலாளிகளுக்கு தினக் கூலி 50 ரூபாய் குறைக்கப்படும் நிலை ஏற்பட்டிருப்பதாகவும் குமுறல்கள் தொடங்கியுள்ளன.

நெசவாளிகள் இவ்வாறு குமுறும் நிலையில், சீனப் பட்டு இறக்குமதியை, அடுத்த 10 ஆண்டுகளில் முற்றிலும் நிறுத்தும் நோக்கத்தில் அரசு இருப்பதும் தெரியவந்துள்ளது.தேசிய பட்டு வாரியத்தின் இந்த தகவல், நெசவாளிகளுக்கு நிச்சயம் கவலை தருவதாக இருக்கும்.

இந்நிலையில் நாட்டின் தேவையை ஈடுகட்டும் அளவுக்கு உள்நாட்டில் கச்சா பட்டு நூல் உற்பத்தி செய்யவும், அதன் விலை பட்டு நெசவாளர்களுக்கு கட்டுபடியாகும் விலையில் கிடைக்கவும் நடவடிக்கை எடுக்க வேண்டியதும் அவசியமாகிறது.