சென்னை போட்டிகளில் இலங்கை வீரர்களை அனுமதிக்க கூடாது:பிரதமருக்கு ஜெயலலிதா கடிதம்

ஐபிஎல் தொடரின் போது சென்னையில் நடைபெறும் போட்டிகளில் இலங்கை வீரர்களை விளையாட அனுமதிக்கக் கூடாது என்று பிரதமர் மன்மோகன்சிங்கை முதலமைச்சர் ஜெயலலிதா வலியுறுத்தியுள்ளார்.

இதுதொடர்பாக பிரதமருக்கு அவர் எழுதியுள்ள கடிதத்தில், தமிழர் இனப்படுகொலை, தமிழக மீனவர்கள் மீதான தாக்குதல் போன்றவற்றால் தமிழகத்தில் இலங்கை அரசுக்கு எதிரான போராட்டங்கள் நடைபெறுவதை சுட்டிக்காட்டியுள்ளார்.இந்த சூழலில் இலங்கை வீரர்கள், நடுவர்கள்,அதிகாரிகள் ஆகியோரை சென்னை மைதானத்தில் அனுமதிப்பது தமிழக மக்களின் எண்ண ஓட்டத்திற்கு எதிரானதாக அமைவதோடு, நிலைமையை மேலும் சிக்கலாக்கிவிடும் என்று குறிப்பிட்டுள்ளார்.

ஆகவே, இலங்கையைச் சேர்ந்த எந்தவொரு நபரும் சென்னையில் நடைபெறும் போட்டிகளில் இடம்பெறக் கூடாது என்று இந்திய கிரிக்கெட் கட்டுப்பாட்டு வாரியத்தை அறிவுறுத்துமாறு பிரதமர் மன்மோகன்சிங்கை அவர் கேட்டுக் கொண்டுள்ளார். இலங்கையைச் சேர்ந்த யாரும் இடம்பெறாவிட்டால் மட்டுமே சென்னையில் ஐபிஎல் போட்டிகள் நடைபெற தமிழக அரசு அனுமதிக்கும் என்றும் அந்த கடிதத்தில் முதலமைச்சர் ஜெயலலிதா தெரிவித்துள்ளார்.