சோதனை விமானம் இயக்கம்: தீருமா ட்ரீம்லைனர் பேட்டரி சிக்கல்?

புதிய லிதியம் -இயான் (lithium-ion) பேட்டரி பொருத்தப்பட்ட ட்ரீம்லைனர் விமானத்தை போயிங் நிறுவனம் சோதனை செய்துள்ளது. வாஷிங்டன் மாகாணத்திலுள்ள எவரெட் விமான நிலையத்தில் இருந்து இந்த சோதனை விமானம் விண்ணில் சீறிப் பாய்ந்தது.

சுமார் 2 மணி நேரம் வானில் பறந்து வட்டமடித்த இந்த விமானம், பின்னர் பாதுகாப்பாக தரையிறங்கியது. இந்த விமானத்தில் பொருத்தப்பட்டுள்ள லிதியம் -இயான் பேட்டரியில், புதிய ஒயர்கள் அமைக்கப்பட்டுள்ளது. கடந்த ஜனவரி மாதம் போயிங் நிறுவனத்தின் 2 ட்ரீம்லைனர் விமானங்களில் பேட்டரி கோளாறு ஏற்பட்டது.

இதையடுத்து இந்தியா, ஜப்பான் உள்ளிட்ட நாடுகளில் 50 ட்ரீம்லைனர் விமானங்கள் இயக்கப்படாமல் நிறுத்தி வைக்கப்பட்டுள்ளன. இந்நிலையில், லிதியம் -இயான் பேட்டரியிலுள்ள வயர்களை மாற்றி, அமெரிக்காவின் போயிங் நிறுவனம் புதிய விமானத்தை இயக்கிப் பார்த்துள்ளது .