அந்தோணி ஒப்புதல் ஹெலிகாப்டர் பேரத்தில் ஊழல் நடந்துள்ளது

கொச்சி : இத்தாலி நிறுவனத்திடம் இருந்து ஹெலிகாப்டர்கள் வாங்கிய
விவகாரத்தில் ஊழல் நடந்துள்ளது என்று ராணுவ அமைச்சர் ஏ.கே.அந்தோணி
கூறியுள்ளார்.
விவிஐபிக்கள் பயணம் செய்ய ராணுவத்துக்கு இத்தாலியை
சேர்ந்த நிறுவனத்திடம் இருந்து ஹெலிகாப்டர்கள் வாங்கியதில் ரூ.400 கோடி
அளவுக்கு ஊழல் நடந்துள்ளதாகவும் விமானப்படை முன்னாள் தளபதி தியாகிக்கு
லஞ்சம் கொடுக்கப்பட்டதாகவும் புகார்கள் எழுந்தது. இது குறித்து சிபிஐ
விசாரணைக்கு அரசு உத்தரவிட்டது. இந்நிலையில், கொச்சியில் நேற்று
பேட்டியளித்த ராணுவ அமைச்சர் அந்தோணி கூறியதாவது:

ராணுவத்துக்கு
ஹெலிகாப்டர்கள் வாங்கிய விவகாரத்தில் ஊழல் நடந்துள்ளது. இந்த பேரத்தில்
லஞ்சம் வாங்கப்பட்டுள்ளது. இது குறித்து சிபிஐ தீவிரமாக விசாரித்து
வருகிறது.
தயவு செய்து சிறிது காலம் பொறுத்திருங்கள். இந்த ஊழலில்
தொடர்புடையவர்கள் மீது கடும் நடவடிக்கை எடுக்கப்படும். ஊழலில்
ஈடுபட்டவர்கள் யாராக இருந்தாலும் தப்ப முடியாது. வெளிநாடுகளில் இருந்து
ஆயுதங்கள், தளவாடங்கள் வாங்கும்போது ஊழல் நடக்க வாய்ப்பு உள்ளது.

இதைத்தடுக்க
உள்நாட்டிலேயே நவீன தொழில்நுட்பங்களுடன் தளவாடங்கள் தயாரிக்கப்பட
வேண்டும். இதற்கு அரசு ஊக்கமளிக்கும். ஊழலை தடுக்க விரைவில் ராணுவ
கொள்முதல் கொள்கை உருவாக்கப்படும். விரைவில் இது குறித்து அறிவிக்கப்படும்.
இவ்வாறு அந்தோணி கூறினார்.