டீசல் இரட்டை விலை விற்பனைக்கு தடை: தீர்ப்பு ஒத்திவைப்பு

டீசல் இரட்டை விலை விற்பனைக்கு விதிக்கப்பட்ட தடையை நீக்கக்கோரி மத்திய
அரசின் சார்பில் தொடரப்பட்ட வழக்கின் தீர்ப்பை சென்னை உயர்நீதிமன்றம் தேதி
குறிப்பிடாமல் ஒத்திவைத்துள்ளது.

மத்திய அரசின் தொகுப்பில் இருந்து வழங்கப்படும் மொத்த கொள்முதல் டீசல்
விலையை மாற்றியமைத்து மத்திய அரசு உத்தரவு பிறப்பித்தது. இதனால் கடும்
நஷ்டம் ஏற்படுவதுடன், பயணிகள் கட்டணத்தையும் உயர்த்தும் நிர்ப்பந்தம்
ஏற்படும் என்று கூறி, தனியாரிடம் மொத்தமாக டீசலை தமிழ்நாடு போக்குவரத்து
கழகம் கொள்முதல் செய்தது

அத்துடன் இரட்டை விலை டீசல் விநியோகத்தை, ரத்து செய்யக்கோரி சென்னை
உயர்நீதிமன்றத்தில் வழக்கும் தொடரப்பட்டது. இதனை கடந்த வாரம் விசாரித்த
உயர்நீதிமன்றம், டீசல் இரட்டை விலை முறைக்கு கடந்த வாரம் தடை விதித்தது.
இந்த தடையை நீக்கக்கோரி மத்திய பெட்ரோலியத்துறை சார்பில் சென்னை
உயர்நீதிமன்றத்தில் மேல்முறையீடு செய்யப்பட்டது.

அதில் உயர்நீதிமன்ற தனி நீதிபதியின் தீர்ப்புக்கு தடை விதிக்க வேண்டும்
என கோரப்பட்டிருந்தது. இந்த மேல்முறையீட்டு மனு மீதான விசாரணை தலைமை
நீதிபதி ராஜேஷ்குமார் அகர்வால், நீதிபதி பால்வசந்தகுமார் ஆகியோர்
முன்னிலையில் இன்று விசாரணைக்கு வந்தது.

அப்போது மத்திய அரசின் சார்பில் ஆஜரான வழக்கறிஞர் கனகராஜ், நாடு
முழுவதும் நடைமுறைப்படுத்தப்பட்டுள்ள டீசல் இரட்டை விலை முறையை
மாற்றியமைக்க முடியாது என்று வாதிட்டார். இருதரப்பு வாதங்களையும்
கேட்டறிந்த நீதிபதிகள், வழக்கின் தீர்ப்பை தேதி குறிப்பிடாமல்
ஒத்திவைத்தனர்.