வண்டல் மண்ணை விவசாயிகள் பயன்படுத்த அரசு அனுமதி

ஈரோடு : குளங்களில் இருந்து வண்டல் மண்ணை இலவசமாக எடுத்து விவசாயிகள்
பயன்படுத்திக் கொள்ள அனுமதித்து முதல்வர் உத்தரவிட்டுள்ளதாக அமைச்சர்
ராமலிங்கம் தெரிவித்தார். ஈரோடு மாவட்டம் சென்னிமலை அருகே பசுவபட்டியில்
இலவச மிக்சி, கிரைண்டர், மின்விசிறி வழங்கும் விழா நடந்தது. விழாவில்,
பொதுப்பணித்துறை அமைச்சர் கே.வி.ராமலிங்கம் இலவச பொருட்களை பயனாளிகளுக்கு
வழங்கி பேசியதாவது:

ஈரோடு மாவட்டத்தில் வறட்சியால் பாதிக்கப்பட்ட
பகுதிகளில் உயர்நிலை ஆய்வுக்குழுவினர் ஆய்வு நடத்தினர். ஆய்வின் போது ஈரோடு
விவசாயிகள், கிராமங்களில் உள்ள குளங்களை தூர் வாரவும், அதில் உள்ள வண்டல்
மண்ணை விவசாய நிலங்களுக்கு இலவசமாக எடுத்து சென்று பயன்படுத்த முதல்வரின்
உத்தரவு வழங்க வேண்டும் என கோரிக்கை விடுத்தனர். இதுதொடர்பாக அன்றிரவே
முதல்வரின் கவனத்திற்கு கொண்டு செல்லப்பட்டது.

உடனடியாக கோரிக்கையை
பரிசீலித்த முதல்வர் ஜெயலலிதா விவசாயிகள் தங்கள் பகுதியில் உள்ள குளங்களை
ஆழப்படுத்தும் வகையில் அதில் உள்ள வண்டல் மண்ணை எடுத்து விவசாய
நிலங்களுக்கு இலவசமாக பயன்படுத்தி கொள்ள அனுமதி வழங்கி உத்தரவிட்டுள்ளார்.
இவ்வாறு அமைச்சர் ராமலிங்கம் பேசினார்.