தண்டனையை ரத்து செய்ய வேண்டும் : கருணாநிதி

தேமுதிக எம்.எல்.ஏக்களுக்கு விதிக்கப்பட்டுள்ள தண்டனையை பேரவைத் தலைவர் ரத்து செய்ய வேண்டும் என திமுக தலைவர் கருணாநிதி வலியுறுத்தி உள்ளார்.
இதுதொடர்பாக அவர் வெளியிட்டுள்ள அறிக்கையில், கடந்த 2011ஆம் ஆண்டு ஆளுநர் உரையாற்றிய போது ரகளையில் ஈடுபட்ட அதிமுக உறுப்பினர்களை அந்தக் கூட்டத் தொடர் முழுவதும் நீக்கம் செய்து நிறைவேற்றப்பட்ட தீர்மானம், மறுநாளே ரத்து செய்யப்பட்டதை நினைவு கூர்ந்துள்ளார். அதேபோல், கடந்த 2007 , 2008 ஆம் ஆண்டுகளில் நடைபெற்ற நிகழ்வுகளையும் அவர் உதாரணம் காட்டிப் பட்டியலிட்டுள்ளார்.

கடந்த 1989 ஆம் ஆண்டு தாம் பட்ஜெட் உரையைப் படிக்க முயன்ற போது அதனை அதிமுகவினர் பறித்துக் கிழித்ததாகவும், அதன் தொடர்ச்சியாக திமுக உறுப்பினர்கள் தாக்கப்பட்டதாகவும் அவர் கூறியுள்ளார். (NEXT)அதுபோன்ற சம்பவத்துக்கே அதிமுக உறுப்பினர்கள் ஒருவாரம் மட்டுமே நீக்கம் செய்யப்பட்டதாகவும், மறுநாளே அவைக்கு வந்து பணியாற்றுமாறு அதிமுகவினருக்கு தாம் வேண்டுகோள் விடுத்ததாகவும் அவர் தெரிவித்துள்ளார்.

இந்த முன்னுதாரணங்களைக் கவனத்தில் கொண்டு தற்போது தேமுதிகவினர் மீது எடுத்துள்ள நடவடிக்கையை ரத்து செய்ய அதிமுக அரசு முன்வரும் என நம்புவதாகவும் கருணாநிதி தமது அறிக்கையில் தெரிவித்துள்ளார்.