சென்னை விமான நிலையத்தை தனியாரிடம் ஒப்படைக்க பரிசீலனை

புதுடெல்லி : சென்னை, கொல்கத்தா விமான நிலைய இயக்கம் மற்றும் நிர்வாகத்தை
தனியாரிடம் ஒப்படைக்க மத்திய அரசு பரிசீலித்து வருகிறது என்று விமான
போக்குவரத்து துறை அமைச்சர் அஜித் சிங் தெரிவித்தார். இந்திய தொழில்
கூட்டமைப்பின்(சிஐஐ) சார்பில் டெல்லியில் நேற்று நடைபெற்ற நிகழ்ச்சியில்
மத்திய விமான போக்குவரத்து துறை அமைச்சர் அஜித்சிங் கலந்து கொண்டார்.
அப்போது அவர் பேசியதாவது:

சென்னை, கொல்கத்தா விமான நிலையங்களின்
நிர்வாகத்தை சர்வதேச டெண்டர்களின் மூலம் தேர்ந்தெடுக்கப்படும் தனியார்
நிறுவனத்திடம் ஒப்படைக்க பரிசீலித்து வருகிறோம். நவிமும்பை விமான நிலைய
திட்டப் பணிகள் விரைவுபடுத்தப்படும். விமான எரிபொருள்(ஏடிஎப்) மீதான வரி
விதிப்பு பிரச்னை குறித்து பெட்ரோலிய அமைச்சகம் மற்றும் நிதியமைச்சகத்திடம்
ஆலோசித்துள்ளோம்.

இந்த எரிபொருளை பெட்ரோலியம் மற்றும் இயற்கை
எரிவாயு ஒழுங்குமுறை சட்டத்தின் கீழ் கொண்டு வந்து, விமான போக்குவரத்து
நிறுவனங்களின் நலனை பாதுகாக்க முயற்சிக்கப்படும். இந்த எரிபொருளுக்கான
விற்பனை வரியை குறைக்க மாநில அரசுகளிடம் விவாதிப்போம். இவ்வாறு அஜித்சிங்
தெரிவித்தார்.

விமான நிலையங்கள் ஆணையத் தலைவர் அகர்வால்
பேசுகையில், ‘தனியார் ஆயில் கம்பெனிகள் மற்றும் விமான போக்குவரத்து
நிறுவனங்களுடன் இணைந்து கூட்டு நிறுவன முயற்சியில், எரிபொருள் தேவையை
பூர்த்தி செய்ய நடவடிக்கை எடுக்கப்படும்’ என்றார்.