எழும்பூர் ரயில் நிலையத்திற்கு வெடிகுண்டு மிரட்டல் விடுத்தவர் கைது

சென்னை எழும்பூர் ரயில் நிலையத்துக்கு வெடிகுண்டு மிரட்டல் விடுத்த
விவகாரத்தில் ஒருவர் கைது செய்யப்பட்டுள்ளார். சென்னை காவல்துறை
கண்காணிப்பாளர் அறைக்கு நேற்றிரவு வந்த தொலைபேசி அழைப்பில் எழும்பூர் ரயில்
நிலையத்தில் வெடிகுண்டு இருப்பதாக தெரிவிக்கப்பட்டது.

இதனையடுத்து ரயில் நிலையத்துக்கு பலத்த பாதுகாப்புகள் போடப்பட்டு,
அனைத்து இடங்களிலும் தீவிரமாக சோதனைகள் நடத்தப்பட்டன. இதில் வெடிகுண்டு
எதுவும் இல்லாதது உறுதி செய்யப்பட்டது.

இதையடுத்து, சைபர் கிராம் காவல்துறையினர் உதவியுடன் நடத்தப்பட்ட
புலனாய்வில், வெடிகுண்டு வைத்திருப்பதாக தெரிவித்த தொலைபேசி அழைப்பு
நுங்கம்பாக்கத்தில் இருந்து வந்தது கண்டுபிடிக்கப்பட்டது.

தொடர்ந்து நடத்தப்பட்ட விசாரணையில் அரியலூரை சேர்ந்த இளையராஜா என்பவர்
மிரட்டல் விடுத்தது தெரிய வந்ததது. அவரை எழும்பூர் ரயில்வே காவல்துறையினர்
கைது செய்து விசாரணை மேற்கொண்டு வருகின்றனர்.