போர்க்குற்றம் குறித்து விசாரணை தேவை: பிரிட்டன் அமைச்சர் வலியுறுத்தல்

இலங்கையின் போர்க்குற்றம் தொடர்பாக முழுமையாக விசாரணை நடத்துவது அவசியம்
என்று பிரிட்டன் வெளியுறவுத்துறை அமைச்சர் அலிஸ்டர் பர்ட்
வலியுறுத்தியுள்ளார்.

பிரிட்டன் நாடாளுமன்றத்தில் இதனைத் தெரிவித்த அவர், போர்க்குற்றம்
குறித்து விசாரணை நடத்த இலங்கை அரசு சம்மதிக்காவிட்டால், அந்நாட்டு
மக்களின் முன்னேற்றத்தில் சிக்கல்கள் உருவாவதை தவிர்க்க முடியாது என்றும்
கூறியுள்ளார்.

சட்டத்திற்கு புறம்பாக நடைபெற்ற கொலைகள், ஆட்கள் காணாமல் போனது ஆகியவை
குறித்து விசாரணை நடத்துவதிலும் இலங்கை அரசு கவனம் செலுத்த வேண்டும்
என்றும் பிரிட்டன் அமைச்சர் வலியுறுத்தியுள்ளார்.

போரில் கற்றுக்கொண்ட பாடங்கள் மற்றும் நல்லிணக்க ஆணைக்குழுவின்
பரிந்துரைகள் அமல்படுத்தப்பட வேண்டும் என்றும் அமைச்சர் அலிஸ்டர் பர்ட்
வலியுறுத்தியுள்ளார்.

2011-ல் இலங்கையில் பிரிட்டனைச் சேர்ந்த ஒருவர் கொல்லப்பட்டது தொடர்பான
விசாரணை தாமதம் ஆவது குறித்து பிரிட்டன் எம்.பி., சைமன் டேன்சக் தாக்கல்
செய்த அறிக்கை மீது பதில் அளித்துப் பேசும்போது பிரிட்டன் வெளியுறவு
அமைச்சர் அலிஸ்டர் பர்ட் இவ்வாறு குறிப்பிட்டார்.

மேலும், இலங்கை உச்சநீதிமன்ற முன்னாள் தலைமை நீதிபதி ஷிராணி பண்டாரநாயகே
மீதான விசாரணை ஏமாற்றம் அளிப்பதாகவும் அவர் கருத்து தெரிவித்தார்.