இலங்கை அரசு குறுக்கீடு : இலங்கையில் தமிழ் ஒலிபரப்பை நிறுத்தியது பி.பி.சி

கொழும்பு: தமிழ் ஒலிபரப்பில் இலங்கை அரசு குறுக்கீடுகளை செய்ததை அடுத்து
அங்கு தனது சேவைகளை நிறுத்தி வைப்பதாக பி.பி.சி அறிவித்துள்ளது. இம்மாதம்
16, 17, 18 ஆகிய தேதிகளில் ஒலிப்பரப்பான தமிழ் நிகழ்ச்சிகளில் இலங்கை அரசு
தீய நோக்கத்துடன் குறுக்கீடுகளை நடத்தியதாக பி.பி.சி தகவல் வந்துள்ளது.
அதனையடுத்து அங்கு பி.பி.சி நிகழ்ச்சிகளை ஒலிபரப்பும், இலங்கை ஒலிபரப்பு
கூட்டுஸ்தபானத்திற்கு எச்சரிக்கை விடப்பட்டது. ஆனால் அதை பொருட்படுத்தாத
இலங்கை அரசு மீண்டும் இம்மாதம் 25ந் தேதி தமிழ் நிகழ்ச்சிகளில் இடையூறு
செய்துள்ளது.

இந்நிலையில் அங்கு ஒலிபரப்பாகும் தமிழ் மற்றும்
ஆங்கில ஒலிபரப்பை நிறுத்திவிட்டதாக பி.பி.சி தெரிவித்துள்ளது. இலங்கை தமிழ்
மக்களுககு உண்மைச் செய்திகளை வழங்கி வரும் தன் சேவையை அந்நாட்டு அரசு
அரசியல் காரணங்களுக்காக சிதைத்துவிட்டதாக பி.பி.சி தெரிவித்துள்ளது.
மேலும், பி.பி.சி நிகழ்ச்சிகள் பற்றி இலங்கை அரசுக்கு ஏதாவது ஆட்சேபணை
இருந்திருந்தால் அவற்றை நேரடியாக தெரிவித்திருக்கலாம் என தெரிவித்துள்ள
பி.பி.சி, தவறான செய்திகளை உள்ளே நுழைத்து மக்களை குழப்புவதை ஏற்றுக் கொள்ள
முடியாது என்றும் தெரிவித்துள்ளது.

கடந்த 2009ஆம் ஆண்டு விடுதலைப்
புலிகள் உள்ளிட்ட மக்களை இலங்கை அரசு கொன்று குவித்த போதும், இதே போன்று
இலங்கை அரசு இடையூறு செய்ததாக பி.பி.சி குற்றம்சாட்டியுள்ளது. ஒலிபரப்பு
நிறுத்திவைக்கப்பட்டாலும் இலங்கை நேயர்கள் இணையதளம் வழியாக பி.பி.சி
நிகழ்ச்சிகளை கேட்கலாம் என அறிவிக்கப்பட்டுள்ளது