ஸ்டெர்லைட் மீது நடவடிக்கை எடுக்க தமிழக அரசுக்கு அதிகாரம் உள்ளது : உச்சநீதிமன்றம்

தூத்துக்குடி ஸ்டெர்லைட் ஆலை மீது நடவடிக்கை எடுக்க தமிழக அரசுக்கு
தகுந்த அதிகாரம் இருப்பதாக உச்சநீதிமன்றம் தெரிவித்துள்ளது. இந்த ஆலையை
மூடுவதற்கு எதிர்ப்பு தெரிவித்து தொடரப்பட்ட வழக்கு, உச்சநீதிமன்றத்தில்
இன்று விசாரணைக்கு வந்தது. தமிழக மாசுக் கட்டுப்பாடு வாரியத்தின் சார்பில்
ஆஜராகி வாதாடிய வழக்கறிஞர் ராஜிவ் தவான், தமிழக மாசுக்கட்டுபாடு
வாரியத்தின் துரித நடவடிக்கையை எடுத்துரைத்தார்.

கடந்த 23-ஆம் தேதி ஸ்டெர்லைட் ஆலையில் இருந்து வெளியேறிய ஒருவித நச்சு
வாயுவால், பொதுமக்கள் கடுமையாக பாதிக்கப்பட்டதாக அவர் கூறினார்.
இதனையடுத்து, ஆட்சியரின் அறிக்கையை ஏற்ற மாநில மாசுக்கட்டுப்பாடு வாரியம்,
அந்த நிறுவனத்தை 30-ஆம் தேதியே உடனடியாக மூட உத்தரவிட்டதாகவும் ராஜிவ்
தவான் குறிப்பிட்டார்.

இதே போல் ம.தி.மு.க.பொதுச்செயலாளர் வைகோவும் மனுதாரர் தரப்பில் நேரில்
ஆஜராகி, பொதுமக்கள் தரப்பு இடர்பாடுகளை விளக்கினார். இந்த வழக்கில், கடந்த
2010-ல் சென்னை உயர்நீதிமன்றம் அளித்த தீர்ப்பின் நிலையே நீடிப்பதாகவும்,
ஸ்டெர்லைட் ஆலை மீது நடவடிக்கை எடுக்க மாநில அரசுக்கு அதிகாரம் உள்ளதாகவும்
தெரிவித்தனர். ஸ்டெர்லைட் ஆலைக்கு எதிராக தொடரப்பட்ட வழக்கில்
உச்சநீதிமன்றம் நாளை இறுதித் தீர்ப்பு வழங்குகிறது.