சென்னையில் “அம்மா” திட்ட முகாம் : 30 நாட்களில் நடவடிக்கை

பிறப்பு, இறப்பு சான்றிதழ், பட்டா மாறுதல், குடும்ப அட்டைகளில்
திருத்தங்கள் உள்ளிட்ட பல்வேறு சேவைகளை உடனடியாக வழங்கும் குறிக்கோளுடன்
தமிழக அரசு அறிவித்த அம்மா திட்டத்திற்கான முகாம் சென்னையில் இன்று
நடைபெற்றது.

சென்னை மாநகராட்சி 110-வது வார்டுக்கு உள்பட்ட நுங்கம்பாக்கம் பகுதியில்
நடந்த இந்தத் திட்ட முகாமில் தமிழக சமூக நலத்துறை அமைச்சர் வளர்மதி கலந்து
கொண்டு பொதுமக்களிடம் இருந்து மனுக்களைப் பெற்றுக் கொண்டார். இதில் பட்டா
மாறுதல், குடும்ப அட்டைகளில் மேற்கொள்ளப்பட வேண்டிய திருத்தங்கள், உதவித்
தொகை கோரும் மனுக்கள் உள்ளிட்ட பல்வேறு மனுக்கள் அதற்குரிய அரசு
அதிகாரிகளிடம் வழங்கப்பட்டன.

தமிழகத்தின் அனைத்துப் பகுதிகளிலும் அரசு அதிகாரிகள் பொது மக்களை
நேரடியாக சந்தித்து அவர்களின் குறைகளை கேட்டறிந்து அதற்கான நடவடிக்கைகளை
மேற்கொள்ளும் விதமாக இந்த அம்மா திட்ட முகாம் நடத்தப்படுகிறது. வாரந்தோறும்
செவ்வாய்க்கிழமைகளில் குறிப்பிட்ட பகுதிகளுக்கு செல்லும் அதிகாரிகள்
பொதுமக்களின் குறைகளை கேட்டறிந்து அதற்கான தீர்வுகளை குறைந்த பட்சம் 30
நாட்களுக்குள் செய்து தரும் வகையில் இது செயல்படுகிறது. கூட்டம்
நடப்பதற்கான அறிவிப்பானது முன்பாகவே பொதுமக்களுக்கு அளிக்கப்படும்.