சத்துணவுக்காக பள்ளி மாணவர்கள் 1கி.மீ., பயணிக்கும் அவலம்!

படிக்கும் வயதில் உள்ள குழந்தைகளை பள்ளியை நோக்கி ஈர்க்கும் வகையில்
தமிழகத்தில் தொடங்கப்பட்ட முன்னோடித் திட்டங்களில் சத்துணவுத் திட்டமும்
ஒன்று.

இந்த திட்டத்தால் பல்லாயிரக்கணக்கான மாணவர்கள் பலன் பெற்று வருகிறார்கள்.

இந்த நிலையில், நாகை மாவட்டம் சீர்காழியை அடுத்துள்ள அரசு உயர்நிலை பள்ளி ஒன்றின் மாணவர்கள் சத்துணவுக்காக பாடாய் படுகின்றனர்.

இந்த மாணவர்கள் எல்லாம் வரிசையாக வீடுகளுக்கு செல்லவில்லை.மதிய
உணவிற்காக 1கிலோ மீட்டர் தொலைவிலுள்ள அரசு தொடக்கப்பள்ளிக்கு
செல்கிறார்கள்.

நாகை மாவட்டம் சீர்காழியை அடுத்த அகர பெருந்தோட்டத்திலுள்ளது, இந்த அரசு
உயர்நிலை பள்ளி. இங்கு, 300க்கும் மேற்பட்ட மாணவர்கள் படித்து
வருகின்றனர். இதில், 80 மாணவர்கள் தினமும் சத்துணவு உண்கின்றனர். இந்த
பள்ளியில் சத்துணவுக்கூடம் பழுதடைந்ததால், 3லட்சம் ரூபாய் செலவில் 2010 -
11ஆம் ஆண்டில் புதிய கட்டடம் கட்டப்பட்டது. ஆனால், அந்த கட்டடம் இன்னும்
திறக்கப்படாமலேயே இருப்பதால், சத்துணவிற்கான மாணவர்கள் பயணம் தொடர்கிறது.

மழை, வெயில் காலங்களில் மதிய உணவு உண்பதற்கு மாணவர்கள் மிகுந்த
சிரமத்திற்கு ஆளாகிவருகின்றனர். சத்துணவுக் கூடத்தை திறக்க வலியுறுத்தி
ஊராட்சி மன்றத்தலைவர் முதல் மாவட்ட ஆட்சியர் வரை அத்தனை பேரிடமும் மனு
அளித்தும் எந்த பயனும் இல்லை என்கிறார்கள் அகர பெருந்தோட்டம் மக்கள்.

அகர பெருந்தோட்டத்திலுள்ள பள்ளியின் சத்துணவுக் கூடம் எப்போது
திறக்கப்படும் என்பது குறித்து மாவட்ட சத்துணவு தனி அலுவரை தொடர்பு கொண்டு
கேட்டபோது, கட்டடத்தில் மின் இணைப்பிற்கான பணிகள் நிறைவடையாத காரணத்தாலேயே
இன்னும் திறக்கப்படாமல் உள்ளதாக அவர் தெரிவித்தார்.

விரைவில் பணிகள் முடிக்கப்பட்டு சத்துணவுக்கூடம் திறக்கப்படும் என்றும் மாவட்ட சத்துணவு தனி அலுவலர் கூறினார்.